車仔麵是香港最地道小食之一，幾乎全港每區總會有一至兩間，但要數到打響名堂後，持續做足50幾年的就要數青衣這間車仔麵了！現時，麵店的老闆是子承父業的王子，他在入行前曾做美容生意，更擁有個人品牌，他坦言，當初要放棄，真的不捨得。但他認為：「飲水思源好緊要，自己食呢碗麵大！」他亦指自己應承了父親：「我會守住個招牌！」
一夜之間變廚師 硬着頭皮上陣
據了解，這個麵檔是由王子的父母於1968年推木頭車賣車仔麵開始，到了2012年，王子王妃兩夫妻正式接手。王子憶述突然有一年爸爸身體突然不舒服，「佢話個檔交畀你啦，但果啲我全部唔識，未學過，焗住上場，入咗呢行，一夜之間就變成廚師！」由於甚麼都不懂，要用一碗麵留住上一代的食客，感覺就如不可能任務。但王子就努力堅持，甚至著手改良菜單，為食客帶來更多選擇。
用心做好父親教的第一道菜
粟米魚肉炸雲吞是王子爸爸第一條教他煮的菜式，「爸爸教我煮時已經有癌症，聲音好沙啞。現時呢個係改良版，香口啲又健康啲。我堅持要做好呢個餸，因為始終係佢第一道教我嘅餸，想盡量做好佢教我嘅嘢。」王子緊記的不只是食譜，還有爸爸及師公的一句話：「做人，煮嘢食最緊要係良心！」所以只要是食物不達標，王子都不會賣給食客。
王妃表示丈夫對食物真的很有要求，「佢對食物直頭叫執著，食物嘅新鮮、食物嘅做法，如果偷懶做少個步驟，令食材食得就得架啦，佢就唔鍾意。炆豬腸用一個炆豬腸嘅煲，唔可以有其他用途，咁呢個都成為咗招牌菜。」
王子指專給豬腸的滷水汁，加入了陳皮，「豬腸可以話係一間車仔麵舖必備，啲人有時嚟到會話『點解無豬腸』個心會有啲唔舒服，隔幾日，再嚟一次『嘩，終於食到豬腸啦』。」
不計較成本 只想做好
原本爸爸在開店時，只有數款小食，到現時已有30幾款，全部都是由王子親自操刀，每份小食都加了創意同心思，而最令他自豪的是名為「出奇蛋」的流心鵪鶉蛋，「初頭都未諗到個名，到見到食客食完都好驚奇咁『點解溏心嘅？』、『入邊鹹嘅？』見個個反應驚奇，不如就叫『出奇蛋』啦！」一粒細小而且無味的蛋，要做到有味道，火候同用料十分重要。王子選擇用價錢貴幾倍的岩鹽，但他直言不介意，「因為個效果好緊要！」
堅持守承諾 守住招牌
陪着王子為麵店打拼的還有王妃，王子坦言：「王妃呢段時間做啲嘢都超出我估計，我呢到天然環境係無冷氣，真係熱，好辛苦架。呢間舖無咗其中一個都運作唔到，我係估計唔到佢係可以同我喺到一齊捱，真係捱架！」另一邊廂，王妃於訪問中笑言：「我最初唔願意架！其實就⋯⋯係因為王子、我老爺，阿爸阿媽唔捨得呢個招牌。」她接着又開始忍着淚說：「想啲仔返嚟幫手做，唔想佢百年歸老，間舖頭都無埋，因為做咗40幾年好有感情。」
當被問到堅持做下去的原因，王子表示：「飲水思源好緊要，連自己食呢碗麵大，做呢行咁耐，生存咁耐自己都唔堅持嘅話，仲有邊個會堅持落去呢。」他覺得車仔麵是一個文化，認為要傳承下去，他忍住淚說：「其實點解會堅持落去，因為呢間舖頭畀到我太多，開心唔開心，喜怒哀樂乜嘢都喺到。我自己感覺，好壞，我爸爸會喺我身邊知道，喺到呢，我覺得佢喺我身邊，我應承咗佢，我會守住個招牌。」
元朗街坊成功召喚雞蛋仔店重開！
必試世一煙韌雞蛋仔 正爆格仔餅
元朗有一間賣雞蛋仔、格仔餅的小店本身已結業，但在街坊的熱情召喚下重開！據說，這間小食最高峰要排45分鐘以上，為了一試其雞蛋仔及格仔餅的滋味，伍倩彤（Gillian）特意選平日下午5點較少人的時段去朝聖，但現場仍然有很多街坊在等候，足見小食店人氣之高！
小食有非常特別的「芝士豬柳蛋雞蛋仔」，Gillian指味道跟快餐店的味道一樣，皮就較軟身，而且每一粒每一啖都可吃到豬柳、蛋和芝士，十分美味。
最新口味有「開心果麻糬雞蛋仔」，口感脆和Q彈，每粒雞蛋仔都有開心果和麻糬，開心果加熱後，香味更出。
除了雞蛋仔，格仔餅也是必試推介，Gillian試了「花生碎格仔餅」，小食有加厚版和薄脆版，前者咬下去有種在吃很厚的麵包蛋糕感覺，至於薄脆版，則較香脆，滿滿花生粒，而且花生醬不會太濃，所以亦不會太油膩。
華記小食 青衣涌美老屋村90號地舖
嘉發小食 元朗教育路3-7號富好大廈地下9號舖
