巾幗梟雄之懸崖丨曾航生難忘揮真‧皮鞭發火變生人勿近 突破「火爆極限」演窮兇極惡龍督軍

「第一日拍真係有啲壓力、唔係好習慣，冇諗過自己心諗嘅程度原來同監製導演想像嘅有距離，惟有現場壓迫自己，盡量將自己最火爆嘅情緒表現出嚟。初頭捉唔到導演把尺都有啲失措，唔知點處理好，最記得有一場戲我要拍枱鬧定欣同祥哥，嗰場戲拍咗好耐、Take咗好多Take，監製嚟咗現場同我面對面傾番。」Sam又感恩「三屆視帝」黎耀祥在旁鼓勵及給予意見，「佢都有畀意見我，佢有畀個佢覺得適合我性格嘅演繹方法出嚟，但監製就覺得我有潛力可以再去盡啲，最終監製嘅指引令到我開咗竅，之後演起上嚟就好過癮、好開心。經過今次嘅訓練，自己都覺得原來曾航生都有啲地方可以再提升，係一個好好嘅鍛煉機會。」

在劇中揮動皮鞭絕不手軟的Sam，笑言現場受訓及拍攝時不但笑料百出、且險象橫生令他慘變生人勿近：「因為嗰條皮鞭係真嘅，嘩！第一有啲重量，第二佢係有威力嘅，我每次發出去哩真係啪啪聲嘅。所以當曾航生喺現場試嘅時候，真係一揮出嚟，大家都嘭一聲都會四散匿埋晒，多謝大家配合。」Sam又笑言現場雖然拍了無數Take，但幸好出街後效果很好，並感激專業的幕後同事謂：「剪出嚟又幾好睇喎，我哋公司同事真係冇得頂呀。」