港姐外景︱倪樂琳王汛文謝淑怡出發菲律賓碧瑤　獲跨性別人士選美冠軍教行Catwalk

三位佳麗首個任務便是學習行Catwalk，她們的導師A.R. Duque非常猛料，雖然A.R. Duque身形比較心廣體胖，但她過往參加過不少跨性別人士選美比賽，更奪得過冠軍寶座，選美經驗絕對豐富，而她在菲律賓亦有為跨性別人士爭取權益。A.R. Duque率先和三位佳麗分享選美經驗，並教她擺出招牌選美動作叉腰Pose，三位佳麗在選美冠軍加持指導下，信心和美態瞬間Level Up！之後正式進入戲肉行貓步，Ellyn、Candice和Zoie全都身高166cm以上，身形高挑Fit到漏，她們以白色背心加牛仔褲上陣，即盡騷完美身段，行Catwalk時更是自信十足，行得似模似樣兼大擺型格Pose，獲A.R. Duque拍手大讚。

事後黎芷珊、Phoebe與三位佳麗一同受訪，芷珊大讚她們行Catwalk表現出色，她說：「我覺得佢哋做得幾好，表現得好從容。」Phoebe點名大讚Zoie：「佢每個Pose都好定，好從容咁表達出嚟。」Zoie聞言即冧笑說：「多謝師姐，我會繼續努力㗎！」問到今次行程最大的挑戰？Candice笑言：「唔夠瞓係最難駕馭。」過來人Phoebe鼓勵她們說：「呢個都係一個挑戰嚟，通常拍劇都係返去休息一個鐘，之後就要再開工，專業藝人可以keep住好精神，佢哋好犀利，休息時間瞌一瞌，一Roll機就即刻進入狀態。」講到挑戰跳民族舞，問到三人對跳舞有否信心？曾是女團成員的Ellyn謙稱：「覺得跳得唔錯，但又唔可以話跳得好好，但起碼手腳協調，想知道我哋跳成點？記得留意節目！」