在家宴客50道菜｜龔嘉欣透露難忘炮製兩道菜 拜邵德龍師傅為師有原因

對於首次擔任飲食節目主持的嘉欣接受TVB.COM訪問，自言最初以為只是用一個嘉賓身份參與：「我初頭唔知係同鼎爺、肥媽仲有幾位嘅名廚一齊煮嘢食，所以之後知道後都有啲壓力畀咗自己，都諗緊點樣做好啲。」

不過嘉欣直言很快調整心態：「我同自己講唔使諗咁多，因為作為平時一個鍾意煮嘢食，但又唔係好叻嘅人，就用一個鍾意煮嘢食嘅角度去問幾位嘅名廚同鼎爺肥媽，煮每一個餸嘅方法，呢個都係我由心而發想去了解同知嘅嘢。」

她又指今次參與此節目，十分感恩能讓觀眾看到自己不同的一面：「以前喺飲食節目主要係做嘉賓，都會煮下嘢食分享下，但今次就係真真正正做一個主持， 自己嚟緊都想做多啲嘅嘗試，畀大家睇到唔一樣嘅我。」

談到在節目中有何難忘的菜式，嘉欣說：「我覺得係鼎爺個盤龍鱔，看似一道好難煮嘅餸，阿爺就教咗個剁豆豉嘅秘訣點樣令到個豆豉香啲，令我發現原來個盤龍鱔係咁易整，但整出來大家都覺得好有睇頭，所以之後我都會嘗試整呢味餸。」

她續說：「另一道係幟哥嘅魚湯，佢嘅做法係三煎三滾，佢教我哋先用陳皮蒸咗條魚仲要係用鯪魚，然後再煎 『𤓎水』隔渣後又再擺番啲魚骨魚肉再煎再『𤓎』番個湯，呢個過程重覆做三次，用嘅時間唔係多過平時好多，但我覺得幾好同埋真係飲到個湯嘅味道係一次比一次香濃。」

另外，今次與4位名廚合作，邵德龍師傅又收了其做徒弟，嘉欣指與他們建立了良好關係，稍後更相約一起吃飯交流下廚心得：「我都有同邵德龍師傅講係認真想廚得一手好菜，唔係為咗邊個而係為咗自己。」