劉佩玥（Moon）於昨晚（24日）一集的《逆天奇案2》大晒好演技！自稱是尤麗胞妹的夏悠倩（劉佩玥飾）表現十分進擊，邀來匡珉（王賢誌飾）為她打官司，與Hazel（蔣祖曼飾）在法庭上鬥得難分難解。為了爭奪巨額遺產，悠倩親自上庭作供，一字一淚訴說與尤麗失散的經過和濃情化不開的姊妹情，大打人情牌佔盡上風！悠倩之後繼續發功，拉攏尤麗死對頭魏兆揚（陳少邦飾）合作， 更氹掂兆揚上庭講出對她有利的證供，充滿機心。與此同時，來到香港爭產的悠倩被黑幫追數，揭露出原來她是一名爛賭鬼，在柬埔寨欠下周身債，身份相當可疑！另邊廂，身為Big Boss魏子樂（張頴康飾）幕後代理人的冠峰（方力申飾）為了激活子樂記憶，特意安排子樂與撞樣尤麗的悠倩見面，子樂見到悠倩後誤以為她是尤麗，捉住她不停嗌老婆，繼續瘋癲！
延伸閱讀：逆天奇案2劇情｜全30集劇透懶人包（持續更新中）危機四伏！陳展鵬/黃智賢/林夏薇/蔣祖曼攜手破奇案
以新的身份「夏悠倩」登場的Moon演出亮眼，與上輯的「尤麗」感覺完全不同，完美地將悠倩的巴渣和爛賭演繹出來，令人眼前一亮。Moon受訪時笑言「悠倩」這個角色超級好玩：「本身佢係唔跟規矩、唔跟正常邏輯去行事嘅人，所有嘢都係靠住佢嘅小聰明，同埋呢個角色真係好好運，所有嘢都可以化險為夷，呢個以運氣擔當嘅實力派，之後會搞出好多麻煩嘅事！」Moon又謂演這個角色要很大體力：「因為悠倩係黐黐地嘅，同現實嘅我都好唔同吓，演起上嚟都有一定難度。」
Moon於昨晚的法庭戲大晒好演技，一人包攬差不多約4分半鐘的戲份，一邊訴說與尤麗的失散經過，一邊淚如雨下。Moon坦言這場戲很複雜：「我演嘅時候要諗，點樣令到觀眾既相信又懷疑，呢個係難度所在。」問到如何培養情緒應付喊戲，她說：「最主要係令自己放輕鬆，因為淨係諗點喊係會有壓力同會做得唔夠好，要諗方法令到自己精神好集中。當我坐喺度時照住情緒去演，所有嘢就會順利完成，當知道導演佢哋都好滿意，我都好有成功感。」
