林盛斌（Bob）在圈中被譽為「金牌媒人」，而他自己本人更是「多福之人」！與老婆黃乙頤結婚17年的Bob育有三女一子，羨煞旁人！近日Bob更揚言要再同老婆追多個龍B，希望可以五福臨門，唔知佢哋係咪真係咁勁，定係已經成事？
不過邊個又話無可能先？今日（6日）下午，Bob在社交平台突然po出四個仔女和老婆抱著bb的合照，見他們笑容滿面望住鏡頭，真係隔著個mon都感受到那份甜蜜與喜悅！Bob還寫道：「有件事，我覺得係有需要話返俾大家知，好抱歉收埋咗咁耐冇同你哋講，因為始終有一日都會有人知，我都真係冇諗過會係咁，我想同大家講………」唔通⋯⋯願望成真？恭喜恭喜！
喂喂喂等等，仲未完呀！原來一片留白下面還有一句至關重要的話揭開謎底：「朱慧敏同陳醫生個BB女真係好得意。」噢～原來係咁！不過不止網民，連圈中好友們都被他「嚇咗一跳」呀，好似王灝兒、黃翠如都貼出哭笑不得的表情，而陳雅麗更在評論區爆笑留言：「以為你生多個。」Bob則回覆：「唔好諗太多。」看來這位「多仔公」仍未有升級「五仔老竇」，大家唔駛心急住呀！
不過話說朱慧敏和老公陳良貴醫生（Jason）的BB真是相當可愛，而兩公婆的這段良緣便是由「金牌媒人」Bob撮合的。時間追溯到2018年，Bob身體抱恙，入院「通波仔」，Jason則是為其做手術的醫生，熱情的Bob都「好識感恩」呀，為Jason公開徵女友，最終在機緣巧合之下，Jason與朱慧敏相識相知相愛，僅僅拍拖一年便火速拉埋天窗。在婚禮當日，Bob更變身「岳父」牽朱慧敏進場，場面搞笑卻感人萬分！
