53歲張文慈夜場登台連遭「鹹豬手」？ 慘呻感被羞辱：好多人摸過我個身

現年53歲的張文慈（Pinky）1996年通過選美入行，2020年起淡出公仔箱並移居內地，最近播出的劇集作品已是2020年的《法證先鋒IV》以及《木棘證人》。Pinky曾於深圳、廣州及上海等地定居，近期就遷到杭州生活，平時經常拍片分享生活之外，亦會直播帶貨，成績更相當不錯。

Pinky早前接受電台節目訪問時透露，除了直播帶貨和拍戲之外，近年還經常穿州過省四出登台，期間更遇上不少驚險事件，令她至今心有餘悸：「有年生日喺夜場登台，唱唱吓歌老闆推個蛋糕出嚟，全場同我慶祝，握手期間我畀人扯咗落台，當時着咗一條低胸露背裙，一仆向前就跌咗落人海裡面，好多隻手兜住我，托返我上去，你諗吓畀幾多人摸過我個身？我都唔知喊唔喊好，但人哋又唔係特登，只係好羞辱嘅感覺，最後都硬住頭皮唱埋落去，一半驚險又一半開心。」

Pinky更自爆在多年前曾試過被跟蹤，有一次她乘坐的車停泊在路邊，一輛車突然打橫阻截她的車：「原來架車跟蹤我哋，好彩有兩個交通警咁啱坐咗喺路邊，嗰架車見到兩個警察，即刻開車走，如果唔係嗰兩個警察，我可能已經畀人捉走咗。」相當驚險。

而在感情方面，Pinky則表示拍拖次數5隻手指數得晒：「入咗行後都係2、3個，我以前好執着架，好介意同好驚畀報紙寫，好驚有唔好影響，但而家咁大個冇乜所謂？我唔會再為拍拖而拍拖，呢個年紀想搵個伴多啲，心態好隨緣。」她更大爆早年曾雪卵：「以前細個好恨結婚生B，但而家唔會，我都唔細啦，搵男友搵老公條件同後生唔同，曾經有想過要小朋友，仲雪咗卵，但都好多年前，而家都唔怕講，唔可以為咗結婚夾硬搵個人去生，而家已經放棄呢個念頭。」