朱智賢17歲愛犬冬甩離世 攬遺物痛哭：放不下

藝人朱智賢（朱朱）向來非常愛錫愛犬冬甩，在今年7月更為冬甩慶生17歲生日，當時她指「五年前你第一次暈咗入醫院，媽媽點都冇諗過你可以活到17歲」更表示只要有她一日，一定會盡能力照顧牠，可見朱朱與愛犬感情深厚。

今日（23日）朱朱發長文透露愛犬冬甩離世，令其傷痛欲絕表示「放不下」，而且，更見到她攬着愛犬公仔大哭，令人傷感。

她發文：「這幾天 心碎遍地，很多人問 “你ok ma?”“唔OK我真係唔OK”，所以請不要再問我O唔OK ，睇cam見到自己喊到心碎個樣都心痛。好多人都話佢而家唔使再受痛苦啦！我知道 但係我都係好想佢返嚟，佢好開心喺天堂跑緊，我知道 但係我都係好想佢喺度，17歲已經好好㗎啦，我知道 但係我真係好掛住佢，我唔要佢離開我，我就是這樣放不下，我還是很執着，很想他回來…。」

朱朱指現時其處理不到所有有關愛犬的物件：「就連佢嘅藥物我都冇辦法處理到，因為我覺得當所有嘢都唔喺度嘅時候，就證明佢真係已經唔喺度…我仲未接受到…晚上我還是會驚醒 怕沒有人照顧他，每天晚上醒來餵他喝水、帶他去廁所、哄他睡覺，已成為生活一部份。知道大家都很擔心我，我只是需要點時間。」

最後她續說：「給他買的聖誕衣服還未有機會穿😔，睡衣也不敢換 是我最後抱着他穿的睡衣，他最後晚餐的那盒三文魚還捨不得丟掉，很慶幸離開前我有親自餵他吃三文魚。本來還想在睡前餵他吃乳酪，跟他最後在家相處時 ，我還是愛意滿滿的抱著他，這就是我一直堅持親自照顧他的原因，Mama loves you forever！」字裏行間也感受到朱朱的不捨、傷痛，網民紛紛留言叫她要好好保重。