吳若希IG狂轟老公與女員工「行太埋」？ 公開對話紀錄句句有骨 怒斥：身有屎！陷婚變危機？

現年32歲的吳若希（Jinny）跟澳門才俊何兆鴻（Alex）在2017年結婚後先後育有一女一子，兩公婆在婚姻初期便經常因小事爭執，Jinny更有將老公「惡行」曝光上網的習慣，不過大部分都是關於老公出街飲酒應酬不回家或者只顧打機等等的小事情。事隔多年，Jinny今日（9日）再次開火公審，力斥老公接送女員工，更公開兩公婆的對話，其中更包含粗口，她嬲爆向老公表示：「好X Sweet呀，仲可以同人一齊搭地鐵返工！」老公即解釋只是要對方簽MPF，Jinny絲毫不接受這個理由，寸爆回覆：「真係好大嘅原因呀，叫佢簽MPF，就要車人返工，又要陪人搭地鐵，好X Sweet呀，你唔好俾人影X到呀！」老公又反駁謂：「其實我真係已經好多嘢煩，我唔明點解我咁樣我都要比（被）人鬧，我唔同你講鬧我都正常，我真係做嘢，我之前幾年做垃圾做唔到嘢又鬧，我而家做正經嘢都鬧！」Jinny續問：「做嘢又要俾我鬧？你做啲咩俾我鬧？」

公開聊天紀錄截圖後，Jinny再交代事件的來龍去脈，並發表感受：「其實呢，女人呢係好敏感嘅，你趷起條尾，都已經知你會做咩㗎！今朝何生好積極咁話要車同事返工，俾我話完之後，好有骨氣地講，連車都唔揸自己搭地鐵！我又唔知點解，突然間覺得佢應該係搭地鐵搵佢公司同事，我Chok完佢第一句，佢又真係答我係Wor！即係我自己都有公司，都有幫人哋供MPF，我而家先知原來MPF需要老闆親自攞文件俾員工簽！男人呢，就好得意嘅，身有屎嗰陣呢，就會話自己已經好多嘢煩，怪番女人唔體諒佢！」最後，再以黑底白字向老公作出警告：「作為太太，要提就提咗GA LA，佢選擇尊重你，定係選擇無視你，係佢嘅決定。有啲人會忍，有啲人會嘈，我呢，同呢個人相處咗八年，太清楚佢咁嘅回答係代表咩！所以呢講埋今次，之後大家喺條街度見到佢同第二條女一齊，唔好大驚小怪，因為佢都係做嘢嘅啫！」

過了幾小時後，Jinny再發布限時動態，謝謝大家關心，不過仍句句有骨：「哇！上完跳舞堂，收到好多安慰我同支持我嘅MSG，放心，我真係冇嬲～與其花時間喺呢啲位，我會選擇好好增值自己！做好一對仔女嘅榜樣。TOUCH WOOD真係要成就人哋一對眷侶嘅話，我起碼有能力養起一頭家，畢竟最愛嘅都係一對仔女。」

至傍晚時分，Jinny再度出po，一一回擊站在其對立面的網民，其中不時包含粗口。